ALL ABOUT EDITH: 中山兩天團（ZZSX02）10-11/09/2011 (1)

中山兩天團（ZZSX02）10-11/09/2011 (1)

今次係我考左個牌第一次出團，以為返工成日都聽人講出團冇乜野做又搵到錢。

今次到我親身體驗﹗希望各位BLOG友唔好怪我冇相喇﹗

我新仔冇時間影相丫﹗請大家見諒

出發前一日就去拎料喇，第一次又真係乜都唔識既，又冇人教，勝在我搵到隔離左右教我姐。

見人地忙，又走左去前台問D FT。人地都過2招比我既。

出發前一日都拎定8折的既電話架喇﹗

出發當日我5點3就起左身喇，怕唔知醒嗎，而且做新仔早D到好﹗

如是者，一起身就CALL的喇，點知的士台話咁早冇的士WO

咁我咪食埋個早餐出門囉

點知一落樓下大把的士等緊我

去到尖沙咀都係10分鐘，仲要係未夠6點丫，等到我悶死丫﹗

最衰既就係我冇客係尖咀上車嗎﹗

係到等，原來同我夾車個個女仔，竟然係我琴晚先識個個女仔。

下稱EC喇﹗不過當EC知道我係同佢夾車個陣，我見到佢口黑面黑囉﹗

因為站頭阿姐同佢講，我係新仔，麻煩佢一陣係車上負責開咪講野﹗

不過佢可能覺得自己細過我，所以呢d野唔洗佢做掛。

但係佢做既野令我有小小覺得佢佢玩九我。

點解我會咁講呢，因為自從我係沙田上左我第一批既客之後，佢就不斷有意無意地係我d客面前講我係新仔。

搞到我好多時都唔想理佢，唔好以為自己好醒先得架﹗

一早見到自己班客，已經覺得佢地唔係幾有善架喇，因為同佢講早晨，佢連回應都廢事丫﹗

未出車，已經做錯事喇，就係搵錯旅遊巴，鬼咩~粉嶺咁q多車係出面。

仲要比自己班客笑/串，真係有小小無地自容丫﹗

好不容易先到落馬洲，EC佢同我講，一埋站我地就跑過關，直接係個到等d客。

我話下，咁都得？咁樣好似無晒服務態度wo，我以前舊公司下下都講服務態度架嗎﹗

EC就話喇wo，係咁架喇，岩架喇﹗

如是者，我咪跟著佢囉﹗都係個句喇﹗新仔嗎﹗

之後就係關口等個班鴨仔喇﹗

數齊就出發過皇崗喇﹗又講下d過關野咁丫，又提下佢地拎齊野咁囉﹗

EC又話要仆出去搵個導遊丫點點點，都係個句，自己係新仔，乜都要跟佢喇﹗

但我最怕自己做錯左第一次，之後都錯﹗唉

姐係d徒弟最怕跟錯師傅咁囉﹗

一過大6，係咁打比個導遊﹗

好釆一出去即刻可以相認到囉﹗

仲見到之前一齊讀會計既同學﹗

可能今時唔同往日喇，做會計可能仲辛苦過我地出團丫﹗

等齊人，就行過天橋上車喇﹗

成程行尾，順便認下d客咁喇﹗

認人我都幾叻架，不過記名就......

好不容易先數齊13個，同埋同團有2位老太太。

特別係有一位接近80既太太，所以我會多加照顧佢。

好喇，數齊人開車。亦即係我既工作正式開始

第一手咪︰

平時唔好見我講野好似好叻咁，其實見到人多，我真係唔識講野﹗

如是者，我既第一次講第一手咪，只係講左幾句了事﹗

大約係︰大家早晨，我代表我地公司美記多謝咁多位團友參加我地公司中山2天團，我係大家既領隊，我姓王，大家可以叫我做阿碟。
黎緊呢2日豐富既行程，除左有我接待大家之外，仲有2位工作人員接待大家，首先有我地當地既導遊L菲小姐喇，同埋我地既陳師傅車我地既﹗
咁我將黎緊既行程就交比L菲小姐同大家講解一下喇﹗

如是者，L菲就出左黎講野喇﹗

呢個時候，大家好似未訓醒咁WO，L菲同咁多位團友講左好多聲早晨都冇人應機。

唔知話D客無禮貌丫，定係話我地自己太有禮貌呢？

第一站我地就去左十九涌同十里河堤，呢2個景點，連我自己都未去過丫﹗

去到之後我發覺呢個景點唔係人行架﹗

點解我會咁講？因為曬到PK丫﹗

萬里無雲丫﹗見導遊搭埋傘都知咩事喇﹗

個到仲要唔比旅遊巴泊入去WO，D客行親死先到﹗

係個到比左一個鐘頭班客去自由活動，而我同L菲就去左食糖水。

我就諗係食返個綠豆沙下下火先喇﹗點知間野玩野話冇凍WO，其他我又唔多岩食WO

而佢又話碗野暖暖地WO，咁咪話照要囉﹗點知...中計丫﹗

食食下，見到我團個班大組過黎﹗

真係唔係好想同時出現，比小小時間我休息下都得掛。

好不容易捱過一粒鐘，等齊人又行返個段路出去搵師傅。

係呢個時候我都頂唔順要開傘丫，我估個日應該有36度以上丫﹗

去完呢2個景點，我地就去開餐喇﹗

係食第一餐既時候，我只可以講，司倍餐好食過佢地百倍﹗

係一個咁熱既天氣入面，對住個爐係到食飯，認真係講句，我真係唔得囉﹗

如果係我，我已經投訢左九世喇﹗

但係呢班客一句都冇講野，但當然我同L菲都識做既。

係咁屈個間野加菜，其實唔可以講屈，因為我地13個客，已經一早打黎講叫加菜加大張台。

其實班客唔出聲，我都會出聲架喇﹗因為咁小菜係台面，唔係我地香港人既作風。

好不容易先食完呢餐，好釆無比D客鬧，不過就算比人篤我地都唔知喇﹗

因為佢地粒聲都唔出，想點我地又唔知WO。

不過唔理喇，食飽就過對面去搭船去個個什麼QQ農場現實版喇﹗

點知有團友提出太熱，問可唔可以唔去係到等，同L菲商量完，佢話OK，咁我就叫佢地1個鐘後係到等喇﹗

點知又有4位話想坐電動船WO，而其他又話太熱唔想坐船，最後所有團友一致同意唔鬼去呢個農場。

就係呢隻電動船。**個2位唔係我既團友﹗

如是者，我地又走喇﹗

去我地第一個既購物點喇﹗就係乜鬼野生物谷﹗

悶到嘔丫﹗第一次坐係個D黑房等鴨仔﹗

聽到報數，發覺唔夠人，又要去捉鴨﹗

係捉鴨既同時，同個團友傾左2咀﹗

我︰E..你做咩出左黎既？食煙丫？
團友M︰係丫﹗
我︰食完就要返入去喇﹗如果唔係我好難做架﹗
團友M︰我都明既，食完我會入去聽書架喇﹗
我︰我見你好多時都係食煙架WO，其實你係咪唔想黎架？
團友M︰係架，我黎既目的係買煙仔架咋﹗
我︰下？咁特別？
團友M︰係香港買貴丫嗎﹗宜家係到食，計埋都唔洗$1/支丫﹗
我︰咁又係既﹗
團友M︰話時話丫，頭先餐飯真係好難頂丫﹗
我︰我都明既，要係咁既天氣要打邊爐又真係慘既﹗
團友M︰都係講下姐，聽完就算喇﹗
我︰哦，唔緊要....

如是者，團友M已經食完煙喇﹗順手帶埋佢入去聽書。

事後聽L菲講，冇客買野囉﹗

聽完咁耐野之後，就去行呢個中山步行街喇﹗

照舊放一個小時自由活動喇﹗